PUNËTORIA E MIRËMBAJTJES

Pas çdo pellgu, pompe dhe makinerie qëndronin njerëz, emrat e të cilëve përmendeshin rrallë, por pa të cilët prodhimi i kripës nuk do të ishte i mundur. Punishtja ishte vendi ku mirëmbahej dhe riparohej i gjithë sistemi teknik i Kripores së Ulqinit.

Në këtë hapësirë punonin mjeshtër të kualifikuar të zanateve të ndryshme – bravandreqës, elektricistë, llamarinistë, saldatorë, mekanikë dhe tornitorë. Punishtja ishte e pajisur me torno, makina shpuese, aparate për saldim elektrik dhe autogjen, si dhe me pajisje të tjera të nevojshme për prodhimin dhe riparimin e pjesëve mekanike.

Këtu riparoheshin çdo ditë pompat, mirëmbaheshin makineritë, prodhoheshin pjesë rezervë dhe eliminoheshin defektet, në mënyrë që prodhimi të vazhdonte pa ndërprerje. Në kuadër të punishtes ndodheshin edhe zyrat e inxhinierëve mekanikë dhe elektrikë, të cilët së bashku me mjeshtrit planifikonin mirëmbajtjen dhe përmirësonin funksionimin e sistemit të prodhimit.

Punishtja ishte shumë më tepër se një hapësirë për riparime. Ajo ishte një vend i dijes, mjeshtërisë dhe zgjidhjeve praktike, ku përvoja përcillej nga brezat më të vjetër te brezat më të rinj të punëtorëve.Çdo defekt i eliminuar me sukses nënkuptonte vazhdimin e prodhimit dhe një hap tjetër drejt mbledhjes së re të kripës.

Sot, ky objekt dëshmon për njerëzit, aftësitë dhe përkushtimi i të cilëve për dekada mbajtën gjallë një nga sistemet më të mëdha industriale në bregdetin e Malit të Zi.