Çfarë është KEZ?
KEZ është një program, por edhe një hapësirë, ku do të shkëmbehen ide, do të fitohen aftësi praktike dhe do të zhvillohen iniciativa ekologjike. Përmes punëtorive të rregullta, diskutimeve, aktiviteteve si krijimi i fidanishteve me lloje autoktone dhe ngjarjeve për shkëmbimin e njohurive, KBE/KEZ inkurajon mësimin nëpërmjet praktikës, duke ndërtuar themelet e përgjegjësisë ekologjike dhe duke aftësuar pjesëmarrësit për të marrë vendime të informuara dhe të qëndrueshme në jetën e përditshme.
Projekti fokusohet në grupe të ndryshme të komunitetit: të rinjtë, të moshuarit, anëtarët e komunitetit rom dhe familjet. Përmes aktiviteteve konkrete dhe punëtorive krijuese, synojmë të rrisim ndërgjegjësimin ekologjik dhe të inkurajojmë lidhjet dhe bashkëpunimin ndërbrezor.
Grupet e synuara dhe objektivat e projektit
Programi KBE/KEZ përfshin grupe të ndryshme shoqërore dhe synon që përmes edukimit dhe aktiviteteve praktike të promovojë ndërgjegjësimin ekologjik, solidaritetin ndërbrezor dhe përfshirjen sociale. Të rinjtë, si aktorët kryesorë të këtij programi, do të kenë mundësinë që përmes pjesëmarrjes direkte në projekte të ndryshme të fitojnë njohuri për ekologjinë, planifikimin hapësinor të qëndrueshëm, ndryshimet klimatike dhe ruajtjen e natyrës. Në këtë mënyrë, dëshirojmë t’i fuqizojmë dhe t’i motivojmë që të bëhen udhëheqës të iniciativave ekologjike në të ardhmen. Njëkohësisht, të moshuarve, veçanërisht pensionistëve, do t’u ofrohet mundësia të përfshihen në aktivitete edukative dhe praktike që jo vetëm kontribuojnë në mbrojtjen e natyrës, por gjithashtu mundësojnë lidhje sociale dhe promovojnë ndjenjën e shkëmbimit dhe solidaritetit ndërbrezor. Në kuadër të programit, i kushtohet vëmendje anëtarëve të komunitetit rom, të cilët përmes punëtorive gjithëpërfshirëse do të marrin pjesë aktive në projekte ekologjike, duke kontribuar kështu në reduktimin e izolimit shoqëror dhe fuqizimin e tyre për angazhime të mëtejshme në komunitet. Gjithashtu, përmes aktiviteteve familjare, si mbjellja e përbashkët e bimëve autoktone dhe veprime të tjera në zonën e Parkut Natyror të Kripores së Ulqinit (dhe në zona të tjera të Komunës së Ulqinit), apo pjesëmarrja në punëtori mbi ndryshimet klimatike, familjet do të kenë mundësinë të forcojnë marrëdhëniet e ndërsjella dhe të zhvillojnë ndërgjegjësimin për rëndësinë e ruajtjes së natyrës në jetën e përditshme. Në këtë mënyrë, projekti synon të fuqizojë të gjitha grupet e synuara, duke krijuar një shoqëri që kujdeset me përgjegjësi për mjedisin e saj dhe brezat e ardhshëm.
Objektivat kryesore të projektit
- Qendra ekologjike e qëndrueshme: KEZ do të shndërrohet në një burim të përhershëm për komunitetin lokal, me një fidanishte të llojeve autoktone që do të shërbejë për edukimin mbi ruajtjen e biodiversitetit dhe mbështetjen e iniciativave për gjelbërimin, si Ozelenimo.me, edhe pas përfundimit të projektit.
- Përfshirja sociale dhe solidariteti ndërbrezor: Me aktivitete të përbashkëta në qendrën ekologjike, dëshirojmë të mundësojmë pjesëmarrjen e grupeve të margjinalizuara dhe të inkurajojmë përfshirjen sociale, veçanërisht të të rinjve nga komuniteti rom dhe të moshuarve.
- Rritja e ndërgjegjësimit ekologjik: Përmes punëtorive edukative dhe aktiviteteve praktike, synojmë të rrisim ndërgjegjësimin ekologjik dhe të përmirësojmë kuptimin e ndryshimeve klimatike ndër të gjitha gjeneratat, duke inkurajuar sjellje të qëndrueshme dhe përgjegjësi ndaj natyrës.
Presim të forcojmë ndërgjegjësimin ekologjik, të përmirësojmë përfshirjen sociale përmes punës së përbashkët dhe të krijojmë rrjetin e parë lokal të entuziastëve ekologjikë. KBE/KEZ do të kontribuojë në transformimin e qëndrueshëm të komunitetit tonë, duke promovuar ndryshime pozitive të qëndrueshme në mbrojtjen e natyrës.
Programi “Këndi i bashkëpunimit ekologjik – KBE/KEZ”, është një hap drejt forcimit të lidhjeve të përbashkëta ndër të gjitha gjeneratat, promovimit të kulturës së qëndrueshmërisë dhe ruajtjes së trashëgimisë natyrore të Ulqinit.
I ftojmë të gjithë qytetarët të na bashkohen në këtë iniciativë të rëndësishme dhe të punojmë së bashku për ndërtimin e një komuniteti më të mirë, ekologjikisht të ndërgjegjshëm dhe për të ardhmen tonë!
Të gjithë jeni të mirëpritur të bëheni pjesë e komunitetit KBE/KEZ, të merrni pjesë në aktivitetet tona dhe të kontribuoni në ruajtjen e natyrës. Së bashku, mund të bëjmë ndryshime të rëndësishme!
Na ndiqni! Në rrjetet tona sociale do të publikojmë së shpejti aktivitetin e parë brenda KBE/KEZ. 😉
“Këndi i bashkëpunimit ekologjik – KBE/KEZ”, mbështetet në kuadër të programit “Të mbështetur = Të fuqizuar”, që realizohet nga Fondi për Qytetari Aktive në partneritet me Fondacionin për Zhvillimin e Komunitetit Lokal “Slagalica” nga Kroacia. Programi financohet nga Bashkimi Evropian dhe bashkëfinancohet nga Ministria e Administratës Publike.